Алматы қаласы Төтенше жағдайлар департаменті Өрт сөндіру және апаттық-құтқару жұмыстары қызметі жеке құрамының штаты биыл ұлғайтылды. Бұл туралы Өңірлік коммуникациялар қызметінің брифингінде ТЖД кадр саясаты басқармасының басшысы Сәуле Шакалова хабарлады.
Спикердің айтуынша, штаттың ұлғаюы Қазақстан Республикасы Үкіметінің қаулысына сәйкес өтті. Алматыда қатардағы және кіші басшы құрамның, атап айтқанда өрт сөндірушілердің, жүргізушілер мен телефонистердің қосымша 262 бос орны пайда болды.
С. Шакалова ізденушілердің азаматтық қорғау жүйесіне қызметке қалай орналасуға болатынын айтып берді. Қызметке орта білімі бар, жасы 35-тен аспаған барлық кәмелетке толған қазақстандықтар тұра алады. Жұмысқа орналасу үшін кандидаттың кәсіпкерлік қызметпен айналыспауы және қылмыстық жауапкершілікке тартылмауы маңызды.
«Барлық кандидаттар денсаулық жағдайы, жеке және іскерлік қасиеттері, заңнаманы білуі, сондай-ақ дене шынықтыру дайындығы бойынша сынақтардан өтеді», - деді ТЖД кадр саясаты басқармасының басшысы.
Өрт сөндіру қызметінің болашақ сарбаздарын алғаш оқыту Мәлік Ғабдуллин атындағы Азаматтық қорғаныс академиясының оқу орталығы базасында өтеді. Өрт сөндірушілер күнтізбе бойынша 35 күн, жүргізушілер 14 күн, қалған үміткерлер апта бойына оқиды. Дайындық кезеңінде тыңдаушылар бюджет қаражаты есебінен тамақпен және тұратын орынмен қамтамасыз етіледі, тағылымдама кезеңіндегі жалақы шамамен 100 000 теңгені құрайды.
С. Шакалова әйелдердің де ТЖД-не, мысалы, радиотелефонист болып орналаса алатынын айтты.
Спикер елімізде офицерлер кадрларын дайындайтын жоғары оқу орны – Көкшетау қаласында Мәлік Ғабдуллин атындағы Азаматтық қорғаныс академиясы бар екенін айтты. Курсанттарды оқыту республикалық бюджет есебінен жүргізіледі.
Курсанттар тегін киім-кешекпен,тамақпен, стипендиямен қамтамасыз етіледі. Академияны тәмамадаған соң оларға «азаматтық қорғаныс лейтенанты» атағы беріліп, жұмысқа міндетті түрде орналастырылады. Кандидаттарды іріктеу жыл сайын ТЖД қаңтар мен мамыр айында жүргізіледі», - деп хабарлады С. Шакалова.
