Әл-Фараби атындағы ҚазҰУ аға оқытушысы, дінтану докторанты Елнар Берікбаев Өңірлік коммуникациялар қызметінің брифингінде ислам ұстанымы тұрғысынан коронавирусқа қарсы вакциналану туралы сұрақтарға жауап берді.
Елнар Берікбаев атап өткендей, қарсылық көрсетушілер кейде өз қозғалыстарында діни сенімдерді қолданады. Ол немен байланысты екенін түсіндірді.
«Әдетте, антиваксерлердің дәлелдерінің көпшілігі ғылыми деректермен расталмайды. Ал Қазақстан азаматтарының көпшілігі өздерін діндар санайтындықтан, діни пікірталастар халық арасында үндеседі», - деп түсіндірді сарапшы.
Е. Берікбаев вакциналануға қарсы қозғалыс Эдвард Дженнер 1796 жылы шешекке қарсы алғашқы вакцинаны жасағаннан кейін көп ұзамай пайда болғанын хабарлады. Ол кезде вакцинацияға қарсы шыққандардың негізгі аргументтері діни болды.
«Олар мұны құдайдың тағдырына араласумен байланыстырды. Айта кетсек, діни вакцинациядан бас тарту – вакцинаға қарсы көптеген себептердің бірі ғана. Олардың арасында фармацевтердің белгілі қастандық теориясы мен басқа да қастандық теориялары бар»,-деп атап өтті Берікбаев.
Дінтанушы вакцинациядан бас тартуды халықтың жекелеген сегменттерінің денсаулық сақтау жүйесіне сенімсіздікпен байланыстырады.
«Жақында Маңғыстау облысында болған оқиғаны еске түсіруге болады. Сегіз жасар бала велосипедтен құлап, қолын сындырды, бірақ оның ата-анасы жедел жәрдемге емес, емшіге жүгінді, ол қолын тексеріп, таңып болған соң баланы үйіне жіберді. Нәтижесінде қолды кесуге тура келді», - дейді теолог.
Ғалым біздің отандастарымыз әлі де халықтық әдістермен емделуде және халық емшілеріне жүгінуді жалғастыруларына өкінішпен қарайды.
Сөзінің соңында Е. Берікбаев исламда ауру кезінде мамандарға жүгіну әдетке айналғанын айтты. Хадистердің бірінде: «Әр ғылымның өз құндылығы бар, оларға жүгіну керек» делінген.
«Дәрігерлер бірінші кезекте вакциналану туралы айтуы керек. Сөздері адамдардың шешімдеріне әсер ететін діни қызметкерлер, өз пікірін айтпас бұрын, мәселені медициналық тұрғыдан түсінуі, дәрігерден кеңес алуы тиіс. Содан кейін ғана олар өтінішпен шыға алады», - деп атап өтті дінтанушы.
