Алматы қаласының Алатау ауданындағы ондаған көше 2021 жылы жөнделеді. Тағы 86 көшеде шұңқырларды жөндеу жұмыстары басталды. Алатау ауданының әкімі Азамат Қалдыбеков алдағы жоспарларымен бөлісті.
Айта кетейік, жол мәселесін шешуге жергілікті атқарушы органдар белсенді атсалысуда.
«Біздің жұмысымыздың басты бағыттарының бірі – жол-көлік инфрақұрылымын дамыту», - деді Азамат Қалдыбеков. Ауданда «Самғау» (3 км), «Өжет» (5,5 км) және «Шаңырақ-5» (6,4 км) шағын аудандарында жаңа жолдардың құрылысы басталды. 38 көшеде 45 шақырым жолды жөндеу жоспарланған. Қазіргі уақытта 3 көшеде орташа жөндеу жұмыстары басталды. Сонымен қатар, 86 көшеде шұңқырларды жөндеу жұмыстары жүргізілуде.
Тақырыпты жалғастырған Алатау ауданының әкімі көшені жарықтандыру туралы айтып берді. Оның айтуынша, қазіргі уақытта Алатау ауданының 85% - ы, яғни 620 көше жарықтандырылды. Жарық нүктелерінің саны-38 105 дана.
«Өткен жылы 413 көшеде 19 471 жарықдиодты шам орнатылды. Биыл қосымша 515 көшені жарықтандыру жоспарлануда», - деді Азамат Қалдыбеков.
