2022 жылдың 22 желтоқсан күні сағат 16:00-де Әбілхан Қастеев атындағы ҚР Мемлекеттік өнер музейінде Қазақстан Республикасының еңбек сіңірген қайраткері, «Парасат» орденінің және Масарик атындағы еуропалық алтын медаль иегері, суретші Алпысбай ҚАЗЫҒҰЛОВТЫҢ «Әр алуан әлем» атты жеке көрмесінің ашылу салтанаты өтеді. Көрмеге автордың жеке жинағынан алынған 100-ге жуық туынды қойылған.
Алпысбай Қазғұлов еліміздің бейнелеу өнеріне 1980-ші жылдары келген суретшілер буынына жатады. Бұл уақытта Қазақстанның көркемсурет өмірі шындықты көрсетудің жаңа аспектілерімен ерекшеленді. Оның шығармашылығының тақырыптары – уақыттың байланысы, ата-бабалардың рухани мұрасы, көшпенділер әлемі, ауыл мен дала философиясы, ежелгі әдет-ғұрыптардың сабақтастығы. Кескіндемешінің туындылары халықтық рухқа толы, сонымен бірге, заманауи көркемдік процестердің проблемаларымен жақсы үйлеседі.
Алпысбай Қазғұлов – бірегей суретші. Суретшінің кескіндемесінің бейнелік қатары алуан түрлі. Оның картиналары сағымға ұқсайды. Жер, аспан, даланың шексіз кеңістігі, көш-керуендер, ат үстіндегі ерлер мен әйелдер, кездесулер мен қоштасулар – бір кенептен екіншісіне ауысатын сюжеттер. Кездейсоқ таң қалдыратын табандылықпен, түрленіп қайталанып отыратын, суретші бейне бір қол жетпейтін нәрсені – ұлттық болмыстың тынысын көрсеткісі келетіндей. Ол туралы Шыңғыс Айтматов: «Дала, ауыл, аула тақырыбымен шектелгеніне қарамастан, Алпысбай біздің санамыздың аясын кеңейтіп, қандай да бір тылсым жолмен өз картиналарына шын мәнінде ғарыштық ауқым береді», - деп жазды .
Қазғұловтың колориті бай, ал композицияның ұйымдастырылуы керемет – түс, бояу қабатының фактурасы және қылқаламның қозғалысы біртұтас, симфониялық дыбысқа біріктіріледі. Суретші бояуларды бірден кенепте араластыра отырып, композицияның жалпы түстік құрылымын жасайды. Кенептің беті күрделі құрылымдық жүйе ретінде жұмыс істейді, онда бір ғана бөлікті, жалпыға тиіспей өзгерту мүмкін емес. Фактура автордың бастан кешкен эмоцияларының толқынын көрсететін туындыны жазу кезіндегі түс ізденістердің күрделілігіне, бояу қабаттарына тікелей байланысты. Суретшінің шығармаларындағы колорит – бұл тек үйлесімділік немесе композицияларындағы түс комбинацияларының сұлулығы ғана емес, сонымен қатар қабілет, мәңгілікке жаңару, осы комбинацияларды іздеу, тақырыптың өзгеруімен бірдей шынайы дүниетаным шеңберінде жаңа шешімдер табу қажеттілігі болып табылады.
А. Қазғұлов еңбекқор суретші, көп жұмыс істеу – оның басты қағидаты. Бүгінгі күнге дейін екі мыңнан астам акескіндемелік туындылар жазды. Автордың айтуынша, алдымен, картинаның түстік шешімін табу маңызды, ал сюжеттер өздігінен пайда болады. Кейбір тақырыптар суретшіні ерекше шабыттандырды, сондықтан, оларды циклдарға біріктіреді. Олардың ішінде: «Дала әуені», «Көшпенділер», «Көкпар», «Біздің ата-бабаларымыз», «Ғашықтар», «Түркістандағы көктем», «Кеңістіктегі ойын» және тағы басқалар.
Алпысбай Қазғұлов 1958 жылы Қызылорда облысы, Арал қаласында дүниеге келген. 1980 жылы Абай атындағы Қазақ педагогикалық институтының көркемсурет-графика факультетін тәмамдаған. Қазақстан Республикасының Еңбек сіңірген қайраткері және «Парасат» орденінің кавалері, ҚР Президент сыйлығының иегері. 2003 жылы Еуропалық өнер одағының Масарик атындағы сыйлығымен марапатталды. 1978 жылдан халықаралық және республикалық көрмелердің қатысушысы. Қазақстан Суретшілер одағының басқарма мүшесі. Туындылары Қазақстан Республикасының Ұлттық музейінде (Астана), Президенттік мәдени орталықта, Әбілхан Қастеев атындағы ҚР Мемлекеттік өнер музейінде, облыстық музейлер қорында, отандық және шетелдік жеке коллекцияларда сақталған.
Көрме жетекшісі - Самал Мамытова
