2024 жылдың 29 наурыз күні сағат 16.00-де Әбілхан Қастеев атындағы ҚР Мемлекеттік өнер музейінде Нұршидин Баратовтың «Үш терезе» атты жеке көрмесі ашылады.
Әр суретшінің шығармашылығында оған жақын тақырыптар, жанр және орындау техникасы бар. Нұршидин Баратов үшін бұл пленэрлік пейзаждық кескіндеме. Табиғаттың өзгермелі, тез өзгеретін тірі ортасы суретшіні баурап алады, одан алынған әсер оның шығармашылығының объектісіне айналады. Көрмеде жыл мезгілдері пейзаждары, қала және ауыл мотивтері, натюрморт және теңіз көріністерін қамтитын тақырыптық топтарға топтастыруға болатын 100-ге жуық туынды қойылады.
Суретшінің ашық аспан астындағы жұмысының ерекшелігі - қысқа уақыт ішінде ең жақсы түс реңктерінің байлығын, табиғат жағдайының жарқын сезімін және оның көркемдігін жеткізе білуі.
Көрме авторы айтқандай: «...мен затқа байланып қалмаймын, мен үшін ол екінші орында». Оның қала пейзаждарында біз әрқашан белгілі бір орынды тани алмаймыз, бірақ біз өзімізді сол жерде болғандай сезінеміз, қар басқан тозығы жеткен үйді, тыныш және шуақты аулаларды немесе қыркүйектің жылы күндерін жақсы білеміз, және оның гүлденген ағаштарына тамсанамыз. Оның шығармаларына қарап отырып, көрермен еріксіз сағыныш сезімін, ерекше көңіл-күйді сезінеді.
Әрбір этюд ерекше әлем іспетті, онда көрермен еске алуды, бір сәттің күйін де, шексіз қиял әлемін де аша алады.
Нұршидин Баратов 1967 жылы Алматы қаласында дүниеге келген. Алматыдағы Н.В.Гоголь атындағы көркемсурет училищесін тәмамдаған, содан кейін Т. Жүргенов атындағы Қазақ ұлттық өнер академиясына монументалды кескіндеме бөліміне түсіп, кейін Ыстамбұлда Мимар Синан атындағы бейнелеу өнері университетінде оқуын жалғастырды. Суретші түрлі елдерге көп саяхаттап, Қырғызстан, Өзбекстан, Беларусь, Түркия, Испанияға бірлескен пленэрлерге барды. Ресейдің Ульяновск қаласында А. А. Пластовтың 130 жылдығына арналған мерейтойлық пленэрге қатысты. Оның картинасы А.А. Пластов музейінің тұрақты көрмесінің коллекциясы үшін сатып алынды, биыл суретші Суздаль қаласының мыңжылдығына пленэрге баруды жоспарлап отыр.
Суретші Украинада, Түркияда, Данияда, Венгрияда жеке көрмелерін өткізді. 2021 жылы Ә. Қастеев атындағы ҚР МӨМ-де «Аспан жақындай түседі» атты алғашқы жеке көрмесі өтті. ALMALINE шығармашылық тобының мүшесі. Алматы, Бішкек, Кипр, Стамбул, Будапешт қалаларындағы топтық көрмелердің қатысушысы. Суретшінің Алматыда жеке сурет галереясы мен «ARTEAST» багет шеберханасы бар.
Экспозиция 2024 жылдың 21 сәуіріне дейін жалғасады.
Көрме кураторы: Қалшора Айжан
