Алматы облысы Әкімдігінің қолдауымен 21 қазан күні, сағат 19:00-де Сүйінбай атындағы Алматы облыстық филармониясына қарасты Ішекті симфониялық оркестрінің "Таңғажайып - симфония" атты концерттік бағдарламасы ұсынылады.
Концерт Құрманғазы оркестрі залында өтеді (Алматы қаласы, Абылайхан даңғылы, 83).
Өнердің алтын қазығына айналған Сүйінбай филармониясының қасиетті шаңырағы астында 1985 жылы өнер зерттеушісі, тарихшы- этнограф Өзбекәлі Жәнібековтың тікелей қолдауымен дүниеге келген «Алтынай» мемлекеттік халық биі ансамблі мен «Адырна» фольклорлы-этнографиялық ансамблі, 1980 жылы Алматыдағы Ықылас атындағы республикалық халық аспаптары музейі жанынан құрылып, 1987 жылы филармония құрамына ауысқан «Сазген» фольклорлы-этнографиялық ансамблі жұмыс істейді.
Сондай-ақ, 2002 жылы ҚР еңбек сіңірген артисі Мұратбек Жүнісбековтың бастамасымен дүниеге келген «Қобыз сарыны» фольклорлы-этнографиялық ансамблі мен 1997 жылы құрылып, 2020 жылы филармония құрамына енген «Ақжауын» камерлық оркестрі сынды өнер құрамдары зор еңбек атқарып келеді.
Ал биылғы жылдың қаңтар айында сол құрамдардың қатарына, төл өнерімізді насихаттау мақсатында «Ішекті- симфониялық оркестрі» қосылды. Құрылған күннен бастап жас оркестр- түрлі шараларға қатысып, өз жұмысын бастап кеткен еді.
Жаңашыл жастармен биік белестерді бағындыру жолында еңбек етіп жатқан Сүйінбай филармониясының жанынан құрылған бұл ішекті-симфониялық оркестрдің құрамындағы 15 өнерпаздың барлығы дерлік халықаралық, республикалық байқаулардың жеңімпаздары.
Скрипка, Альт, Виолончель, Контрабас секілді аспапты оркестрдің репертуары - классикалық, заманауи шығармалардан, сондай-ақ қазақтың халық әндері мен күйлерінің өңделген нұсқаларынан тұрады.
Көркемдік жетекшісі Құрманғазы атындағы қазақ ұлттық консерваториясының түлегі, халықаралық байқаулардың лауреаты Мақсат Нұрланов!
Концертте оркестрдің сүйемелдеуімен: Шаба Әденқұл, Әділ Ахметжан, Балауса Самрұққызы Айбек Жекенов, Ғаламат Бейсеқожа, Диас Елемес және «Қобыз сарыны» фольклорлы- этнографиялық ансамблі мен «Алтынай» мемлекеттік халық биі ансамблдері өнер көрсетеді.
