2025 жылдың 7 наурыз күні сағат 16.00-де Әбілхан Қастеев атындағы ҚР Мемлекеттік өнер музейінде суретші Рафаэль Слекеновтың «TANIR NURY» жеке көрмесінің ашылу салтанаты болады. Көрмеге суретшінің 90-ға жуық кескіндемелік туындылары ұсынылады.
Рафаэль Слекеновтың шығармашылығы – балалық шақ туралы естеліктер мен адамзат пен нәзік табиғат, қоршаған әлем арасындағы үнсіз байланысты көрсете отырып, өзінің шығармашылығынан сыр шертеді. Автордың туындыларындағы жан сарайының көрінісі бір өзгеше сұлу да, сырлы, таңғажайып жұмбаққа толы «үй әлемін» құрайтындай. Автор үшін бұл жұмбақ мекен үйі – қорғаны, құтқарушы орны, өмірінің жылуы мен жайлылығының бейне бір көрінісі. Дәл осы үйде, қарапайым тұрмыста, адамдардың рухани еңбегі мен табиғаттың жасыл шұғыласында автор адам болмысының поэзиясын көреді.
Рафаэльдің туындыларында көкшіл түс ерекше орын алады. Ол дәстүрлі түсінік бойынша, Тәңірдің көк аспанмен байланысуы түркі халықтарының нанымында - маңызды және құрметті болып саналады. Сондықтан да, көрме «TANIR NURY» деп аталады.
Суретші өз туындыларында туған табиғатын халық шығармашылығының көзқарасы арқылы бақылаушы ретінде көрсетуді таңдаған. Оның шығармашылық дамуын ауыл тұрмысындағы заттардың сипаттамасынан бастап, қазақ ою-өрнегінің жолақтарына дейінгі пейзаждарды үлкен түстік дақтармен өзгерту үрдісін айқын көрсетеді. Кескіндер мен пішіндерді жазықтықта жайып, суретші өзінің ерекше шартты кеңістігін жасайды. Мұнда дәстүрлі мәдениет шеберінің тәжірибесі мен заманауи суретшінің көзқарасы тоғысады.
Рафаэль Слекенов 1973 жылы Атырау облысы Индер ауданында туған. 1998 жылы Х.Досмұхамедов атындағы Атырау мемлекеттік университетінің «Музыка және бейнелеу өнері» факультетін бітірген. Қазақстан Суретшілер одағының мүшесі, 2007 жылдан Көркемсурет академиясының корреспондент мүшесі. «Тарлан» сыйлығының иегері. 2000 жылы «Жігер-2000» халықаралық фестивалінің ІІІ орын, 2001 жылы 4-ші Халықаралық «Шабыт» шығармашыл жастар фестивалінің 1-орын иегері. 2008 жылы Польша Мәдениет министрлігінің шәкіртақысы на ие болды. 2010 жылдан бастап Стокгольмдегі «Mirra Art Group» суретшілер халықаралық қауымдастығының мүшесі.
Суретші Италия, Ресей, Шотландия, АҚШ, Канада, Қытай, Англия, Польша, Швеция және т.б. елдердің көрмелеріне қатысты. Жеке көрмелері Лондон, Рим, Мәскеу, Варшавада өткен. Біздің елімізді халықаралық аренада бірнеше рет таныстырған.
Экспозиция наурыз айының 30-на дейін жалғасады.
Көрменің кураторы: Лаура Әбілдаева - ғылыми қызметкер
