Сыбайлас жемқорлыққа қарсы сананы қалыптастыру қоғамдағы парақорлықты жою жолындағы маңызды қадам болып табылады. Бұл туралы ӨКҚ алаңында өткен брифингте ҚР Сыбайлас жемқорлыққа қарсы іс-қимыл Агенттігінің Алматы қаласы бойынша департаментінің басшысы Арман Рахимов мәлімдеді.
Жобаның мақсаты – азаматтарды, қоғамдық бірлестіктерді, кәсіпкерлік субъектілері мен квазимемлекеттік секторларды, сондай-ақ басқа да ұйымдарды сыбайлас жемқорлыққа қарсы іс-шараларға волонтер ретінде тарту.
«2023 жылдың тамыз айынан бастап «Сыбайлас жемқорлыққа қарсы волонтерлік» жобасы сәтті жүзеге асырылуда, оған Алматы қаласында 260-тан астам азамат қосылды», - деді Арман Рахимов.
ӨКҚ спикері қысқа мерзімде белгілі нәтижелерге қол жеткізілгенін атап өтті. Осылайша, мемлекеттік сатып алу мониторингі барысында 312 миллион теңгеден астам бюджет қаражатын үнемдеуге қол жеткізді.
Балалар ойын алаңдарына, салынып жатқан нысандарға, асфальтбетон төсеніштері мен басқа да әлеуметтік нысандарға мониторинг жүргізілді.
Мемлекеттік сатып алу мониторингінің қорытындысы бойынша аудан әкімдігімен жалпы құны 1,3 млрд теңгені құрайтын «240 аула аумақтарына жөндеу жүргізу» туралы хабарландыру жарияланғаны анықталды. Келісімшартты тексеру кезінде қызмет ақысы толық көлемде төленгені анықталды. Алайда, волонтерлік топ көшпелі мониторинг жүргізу барысында спорттық құрал-жабдықтардың жеткіліксіздігі (әткеншек, баскетбол қалқандары, көше тренажерлері), орындықтардың, қоқыс жәшіктері мен сыртқы жарықтандыру құрылғыларының жоқтығы секілді т.б. бұзушылықтарды анықтады. Аталған факті бойынша аудан әкімдігіне хат жолданып, нәтижесінде кемшіліктер жойылды.
Сыбайлас жемқорлықтың алдын алу бойынша жұмыс қоғам қайраткерлерімен, үкіметтік емес ұйымдардың, азаматтық альянстардың өкілдерімен, бизнес белсенділерімен және жастар қозғалысының жетекшілерімен тығыз байланыста жүргізіледі.
«Жыл басынан бері сыбайлас жемқорлыққа қарсы мәдениетті қалыптастыру аясында түрлі форматтағы 50 іс-шара өткізілді, оған 3 мыңнан астам адам қатысты», - деді А. Рахимов.
Ол сөз соңында, қоғам сыбайлас жемқорлық тәуекелдеріне сыртқы талдау жүргізуге, сыбайлас жемқорлықпен күресуге бағытталған түрлі іс-шараларды ұйымдастыруға, өзекті мәселелерді талқылауға қатысатынын атап өтті.
