Алматыда 266 мыңнан астам бала қосымша біліммен қамтылған. Бұл қаладағы мектеп оқушысының жалпы санының 85%-ы. Өңірлік коммуникациялар қызметінде Білім басқармасының басшысы Сәкен Аралбаев осылай деп хабарлады.
Қалада қазір 20 мемлекеттік пен 111 жекеменшік қосымша білім беру ұйымы жұмыс істейді. Әлеуметтік тұрғыдан осал санаттағы балаларды тегін үйірмелер мен секциялармен қамтуға көп көңіл бөлініп жатыр.
Спикердің айтуынша, мемлекеттік білім беру тапсырысы bilimalmaty.kz порталы арқылы жүзеге асады. Мемлекеттік қосымша білім беру ұйымдарында шамамен 38 мың бала білім алса, жекеменшік мекемелерде 10 мыңнан астам бала қамтылған. 218 мыңнан астам оқушы мектеп жанындағы үйірмеге қатысады.
Соңғы жылдары Алматыда балалардың осы заманғы шығармашылық орталығының желісі қарқынды дамып келеді. Мәселен, 2023 жылы Алатау мен Наурызбай ауданында робототехника, STEM мен IT бағыты бойынша екі инновациялық шығармашылық орталығы ашылды. Олардың әрқайсысы 5 мың баланы қамтуға арналған.
2024 жылы №8 балалар музыка мектебі 500 орындық жаңа ғимаратқа ие болды.
«2025 жылы ғылыми, шығармашылық пен спорттық бағытты қамтитын “Шабыт” пен “Самғау” дейтін балаларды дамыту орталығы өз жұмысын бастады. Олардың әрқайсысы 2 500 балаға арналған», – деді Сәкен Аралбаев.
Сонымен қатар, биыл Балаларды қорғау күні қарсаңында Саялы шағын ауданында қалада баламасы жоқ инновациялық «Жігер» шығармашылық және даму орталығы ашылды.
Жыл соңына дейін осындай үлкен орталықты Түрксіб ауданында да ашу жоспарланған. Сәкен Аралбаевтың айтуынша, мұндай мекемелер желісін дамыту балалардың тұрғылықты жеріне қарамастан бірдей сапалы қосымша білім алуына мүмкіндік береді.
Алматы қаласының Өңірлік коммуникациялар қызметі
