Қазақстан Республикасы Тәуелсіздігінің 30 жылдығына арналған іс-шаралар аясында Алматы өңірлік коммуникациялар қызметінің алаңында «Қазақстан Республикасындағы білім беру жүйесін модернизациялау» кітабының таныстырылымы өтті. Оның авторы – Қазақстанның еңбек сіңірген қайраткері, Қазақстан Республикасы Ұлттық Ғылым академиясының академигі, Ресей білім академиясының академигі Алма Әбілқасымова.
Кітап авторының айтуынша, тәуелсіздік алғанға дейін біздің еліміздің білім беру жүйесі кеңестік қағидаттарға негізделген – ақысыз, қол жетімді, міндетті мектеп білімі, оның мазмұны бірыңғай стандарттар бойынша анықталған.
«Тәуелсіздік алғаннан кейін Қазақстанның білім беру жүйесінің басты міндеті оның барлық құрылымдары мен олардың қызметінің әлемдік білім беру кеңістігіне кіруі болды, бұл мектепте де, жоғары білім беруде де дәйекті түрде жүзеге асырылды. Бұған Үкімет, Білім және ғылым министрлігі тарапынан үлкен күш-жігер қажет болды. Білім берудің жаңа стандарттарын әзірлеу, білім беру мазмұнына өзгерістер енгізу, оқыту процесіне заманауи технологияларды енгізу, оқыту әдістемесін жетілдіру қажет болды. Нәтижесінде осы міндеттердің барлығы сәтті жүзеге асырылды», - дейді А. Әбілқасымова.
Спикер қазіргі кезде Қазақстанның білім беру жүйесі оның дамуындағы жалпы әлемдік үрдістерге сәйкес келетінін және еліміздің әлемдік білім беру кеңістігіне сәтті енгенін атап өтті.
Педагогика ғылымдарының докторы, профессор ҚР Тұңғыш Президенті Н. Назарбаевтың білім беру жүйесін дамытуға қосқан зор үлесін атап өтті. Ол 2005 жылы «Халықаралық бағдарламалар орталығы» ашылғанын, соның арқасында ҚР көптеген азаматтардың «Болашақ» стипендиясын алып, шетелде оқудан өткенін еске салды.
«Әлемнің 30 елінде 40 мыңнан астам жас қазақстандық білім алды, бұл білімді жастардың бір бөлігі Қазақстанның білім және ғылым жүйесіне келді, осылайша елдің білім беру ұйымдарының білімдері мен дағдылары байытылды», - деп атап өтті кітап авторы.
Бұдан басқа, А. Әбілқасымова өзінің ғылыми еңбегінде Тәуелсіздік жылдары мемлекеттік емес білім беру секторының құрылуын және 12 жылдық оқуға көшуді сипаттайды.
Бұл ретте кітап авторы 30 жыл ішіндегі жетістіктер туралы ой қозғап қана қоймай, әлемдегі білім беруді дамыту үрдістеріне сәйкес келетін Қазақстанның білім беру жүйесін одан әрі жаңғырту үшін өзінің көзқарасын ұсынады.
Профессор еңбегінің рецензенттері – Қазақстанның бұрынғы Білім және ғылым министрі, ҚР ҰҒА президенті, академик, химия ғылымдарының докторы, профессор М. Жұрынов, сондай-ақ әл-Фараби атындағы ҚазҰУ ректоры, ҚР ҰҒА құрметті академигі, филология ғылымдарының докторы, профессор Ж. Түймебаев.
Кітапты Қазақстан Республикасы Жоғары оқу орындарының қауымдастығы жариялауға ұсынды және үш тілге аударылды.
