2024 жылғы 21-23 қарашада Алматы қаласында «Орталық Азиядағы туризмнің тұрақты дамуы: сын-қатерлер, мүмкіндіктер және перспективалар» тақырыбындағы II Халықаралық форум өтеді. Іс-шара әл-Фараби атындағы Қазақ ұлттық университетінің базасында өтеді және өңірде туризмнің тұрақты дамуының өзекті мәселелерін, мүмкіндіктері мен перспективаларын талқылау үшін көшбасшылар мен сарапшыларды жинайды.
Форумның негізгі ұйымдастырушылары әл-Фараби атындағы Қазақ ұлттық университетінің География және табиғатты пайдалану факультеті мен Рекреациялық география және туризм кафедрасы болып табылады. Форум жұмысына БҰҰ Дүниежүзілік туристік ұйымы (UNWTO), Қазақстандағы БҰҰ Даму бағдарламасы (БҰҰДБ) сияқты халықаралық ұйымдардың өкілдері, сондай-ақ АО «НК «Kazakh Tourism», Қазақстан туристік қауымдастығы, 15 елдің ғалымдары, оқытушылары, туристік бизнес пен үкіметтік емес ұйымдардың өкілдері қатысады.
Форум бағдарламасы туризм саласында тұрақты даму қағидаттарын іске асырудың өзекті мәселелері бойынша ғылыми пікірталастарды, сарапшылардың семинар-тренингтерін, тәжірибе алмасуды және Үлкен Алматы шатқалында экологиялық жүгіру (плоггинг) өткізуді қамтиды.
Форумның маңызды оқиғаларының бірі — Орталық Азиядағы Тұрақты даму орталығының ашылуы. Жаңа орталық экологиялық жауапты туризмді дамытуға, өңірдің табиғи және мәдени мұрасын сақтауға, сондай-ақ тұрақты дамудың инновациялық тәсілдерін әзірлеуге бағытталған ғылыми зерттеулер мен практикалық бастамалар үшін бірегей алаңға айналады. Орталықтың ашылуы өңірдің тұрақты туризм мен қоршаған ортаны қорғаудың жаһандық стандарттарына интеграциялануға деген ұмтылысын көрсетеді.
Форумның ашылу салтанаты «Farabi HUB» инновациялық орталығында өтеді. Құттықтау сөздерін UNWTO-ның Тұрақты даму және тұрақтылық департаменті директорының орынбасары София Гутьеррес, Қазақстандағы БҰҰДБ тұрақты өкілі Катаржина Вавьерниа, Гонконг политехникалық университетінің қонақжайлылық және туризм менеджменті мектебінің деканы әрі профессоры Кайе Чон, Қытай мәдениет және туризмдегі үлкен деректерді зерттеу институтының атқарушы деканы Лина Жонг айтады.
Форум барысында тұрақты туризм саласындағы технологиялар мен инновациялар, қонақжайлылық индустриясындағы әйелдердің рөлі, экотуризмнің болашағы сияқты тақырыптар талқыланады. Бұл сессиялар халықаралық және қазақстандық сарапшылар арасында тәжірибе алмасу алаңына айналып, әртүрлі елдердің табысты тәжірибелерін ұсынады.
Форумда халықаралық ынтымақтастықты нығайтуға және тұрақты туризмді дамытуға бағытталған бірнеше маңызды келісімдерге қол қойылады. Олардың ішінде:
- Әл-Фараби атындағы ҚазҰУ мен Гонконг политехникалық университеті арасындағы туризм саласындағы академиялық алмасулар мен бірлескен зерттеулерді дамытуға бағытталған ынтымақтастық туралы келісім.
- Әл-Фараби атындағы ҚазҰУ мен Қазақстандағы БҰҰДБ арасындағы меморандум. Бұл келісім туризм және қоршаған ортаны қорғау салаларында тұрақты даму мен инновацияларды ілгерілетуді қамтамасыз етуге бағытталған.
- Әл-Фараби атындағы ҚазҰУ мен Индонезияның Палембанг туризм политехникалық институты арасындағы меморандум. Бұл білім беру және ғылыми бастамаларды дамытудағы маңызды қадам ретінде қарастырылады.
Форум Орталық Азия экожүйелерін сақтауға және әлеуметтік жауапты туризмді дамытуға бағытталған тұрақты тәжірибелерді енгізу үшін тәжірибе алмасу мен серіктестік орнату алаңына айналады.
