Алматыда Тәуелсіздік жылдары халық санағы қалай өткенін айтылды. Алматы қалалық Жоспарлау және урбанистика басқармасының басшысы Алмасхан Ахмеджанов Өңірлік коммуникациялар қызметінде өткен брифингте Халық санағының қажеттілігі мемлекеттілік пайда болған кезде туындағанын айтты. Алайда, санақ заманауи мағынада жақында пайда болды. 2021 жылғы халық санағында маңызды жаңалықтар болады.
А. Ахмеджанов БҰҰ-ның халық санағы мен тұрғын үй қорын жүргізу жөніндегі Еуропалық статисттер конференциясының ұсыныстарына сілтеме жасай отырып, халық санағы ел аумағында тұратын халық санының ресми есебін тұрақты уақыт аралықтары арқылы жүргізуге мүмкіндік беретінін хабарлады.
«Тәуелсіз Қазақстанда алғашқы ұлттық халық санағы 1999 жылы, ал екіншісі – 2009 жылы өтті. Ауқымды шараны Қазақстан Республикасы Статистика агенттігі ұйымдастырды. 2018 жылдың сәуір айында Қазақстан халқының пилоттық санағы өтті», — деді А. Ахмеджанов.
COVID-19 пандемиясына байланысты Қазақстан Республикасында 2020 жылға жоспарланған кезекті ұлттық халық санағын өткізу 2021 жылға ауыстырылғаны белгілі.
Ведомство басшысы атап өткендей, Қазақстан Республикасы Статистика агенттігі халықтың алдыңғы санақтарының, әлеуметтік-демографиялық зерттеулердің қолда бар материалдарын жинады және зерттеді, демограф-ғалымдардың және басқа да мамандардың ұсыныстары мен ескертулері, осындай іс-шараларды өткізу бойынша халықаралық ұйымдардың ұсынымдары мен тәжірибесі ескерілді.
"1 қыркүйекте бұл ауқымды процесс басталды, ол ең сенімді ақпарат көзі болып қала береді, өйткені ол азаматтардың жеке сауалнамаларына негізделген. Халық санағының қорытындысын асыра бағалау қиын. Өйткені, бұл жай сандар емес. Бұл деректер Қазақстан Республикасында өткен 10 жыл ішінде халықтың демографиялық және әлеуметтік-экономикалық дамуында болған экономикалық, демографиялық және әлеуметтік өзгерістерді көрсетеді", - деп есептейді А. Ахмеджанов.
Қалалық жоспарлау және урбанистика басқармасы басшысының пікірінше, санақ қала және ауыл халқының санындағы, жынысы мен жасына, неке жағдайына, ұлттық құрамына, азаматтығына, діни сеніміне, білім деңгейіне, тілдерді меңгеруіне, үй шаруашылықтарының саны мен мөлшеріне, тұрғын үй жағдайларына және басқа да сапалық және сандық белгілеріне қарай өзгерістерді анықтауға мүмкіндік береді.
"Халық санағының нәтижелері үй шаруашылықтарының жағдайын, неке-отбасы қатынастарын жақсарту, мүмкіндігі шектеулі адамдардың өмірін, халықтың тұрғын үй жағдайларын жақсарту, сондай-ақ білім беру, жұмыспен қамту, туу және көші-қон мәселелері бойынша шешімдер қабылдау жөніндегі мемлекеттік бағдарламаларды әзірлеу үшін қажет", - деп толықтырды А. Ахмеджанов.
Соңында спикер халық санағына қатысатын алматылықтар өздері туралы ақпарат беріп, әлеуметтік бағдарламаларды әзірлеуге қатысатынын атап өтті. Мысалы, жұмыссыздардың жауаптары еңбек нарығын зерттеуге және қажет болған жерде жаңа жұмыс орындарын құруға мүмкіндік береді. Балалар саны туралы мәліметтер мектептер, бақтар және басқа да балалар мекемелерін салу жоспарларын түзетуге көмектеседі. Тұрғылықты жері туралы деректер жолдар мен басқа да қажетті инфрақұрылым құрылысын жоспарлауға мүмкіндік береді.
"Алматының барлық тұрғындарын онлайн-санаққа немесе оның дәстүрлі форматына қатысуға шақырамын. Өз жауаптарыңыздың арқасында әрқайсыңыз өз өміріңіздің жақсаруына әсер ете аласыз", - деді А. Ахмеджанов.
Қазіргі уақытта ҚР-да халық санағының алғашқы онлайн-кезеңі жүріп жатыр. Ұлттық статистика бюросының мәліметі бойынша, 12 күн аралығында sanaq.gov.kz сайтында сұрақтарға 1 756 002 адам,авторизациялау арқылы Еgov порталында – 203 672 қазақстандық жауап берді. Тағы 82 202 респондент aitu қосымшасында санақ сұрақтарына жауап берді.
Сайт sanaq.gov.kz 15 қазанға дейін тәулігіне 24 сағат қол жетімді. Онлайн санақ жүргізбегендерге сұхбат алушылар 1-30 қазан аралығында сұрақ қояды. Барлық сұрақтар бойынша тәулік бойы жұмыс істейтін 1446 Сall-орталығына хабарласуға болады. Қоңырау шалу тегін.
