«Конституция – құқық қана емес, міндет те»: Алматыда Ата Заңның елдің дамуына қосқан рөлі талқыланды
Өңірлік коммуникациялар қызметінің алаңында Қазақстан Республикасы Конституциясының 30 жылдығына арналған брифинг болып өтті. Пресс-конференцияның спикері – Алматы қаласы Азаматтық альянсының төрағасы, қалалық қоғамдық кеңестің мүшесі Қайыржан Әбдіхалыков. Ол азаматтарды конституциялық міндетін ұмытпауға шақырып, елдің Негізгі Заңының тұрақтылығы мен өзектілігін атап өтті.
— «30 жыл ішінде біз Қазақстан Республикасының Конституциясы – тұрақты әрі өміршең құжат екеніне көз жеткіздік. Ол елмен бірге дамып, ішкі және сыртқы сын-қатерлерге жауап беріп келеді», – дейді Қайыржан Әбдіхалыков.
Спикердің айтуынша, Конституция – заңнамалық жүйенің іргетасы ғана емес, сонымен қатар азаматтар мен мемлекеттік институттардың өмір сүру қағидаттарын айқындайтын үлкен құжат та.
— «Конституция – бұл жай ғана ереженің жиынтығы емес. Бұл – билік тармақтарының мәртебесінен бастап, әр азаматтың құқығы мен міндетіне дейінгі үлкен жүйе. Ол біздің демократияға, адамгершілік пен әлеуметтік әділдікке негізделген мемлекет ретіндегі болмысымыз», – деп атап өтті ол.
Брифинг барысында соңғы жылдағы реформаларға, әсіресе 2022 жылғы маусымда өткен референдумнан кейін енгізілген өзгерістерге назар аударды. Бұлар президентіміздің бастамасымен жүзеге асқан болатын.
— «Реформаның арқасында азаматтарды мемлекетті басқаруға қатыстыратын жаңа тетіктер енгізілді. Ашықтық, жариялылық, биліктің есеп беруі – бұл құр ұран емес, бүгінде нақты жұмыс істеп тұрған қағидалар», – дейді спикер.
Оның айтуынша, қазіргі уақытта барлық министрлер мен жергілікті атқарушы органдардың басшылары халық алдында есеп беруге міндетті. Мұндай өзгеріс конституциялық нормалардың арқасында іске асып отыр.
— Конституция бізге құқық берумен қатар, міндет те жүктейді. Мемлекеттің игілігін көріп, осы елде өмір сүріп жатсақ, Конституцияда көрсетілген міндеттерімізді де орындауға тиіспіз», – деді Азаматтық альянс төрағасы.
Сонымен қатар, ол азаматтық қоғамды дамытудың маңызына тоқталып, мемлекеттік бағдарламалар мен бюджет шығынын бақылауда қоғамға кең мүмкіндік беретін Қоғамдық бақылау туралы заңның қабылданғанына алғыс білдірді.
— «Бұл – шын мәнінде революциялық қадам. Ол Конституцияның халық үшін жазылғанын, адам мүддесін бірінші орынға қоятын қағидаларға негізделгенін көрсетеді», – деді Қайыржан Әбдіхалыков.
Сөз соңында ол Конституция ресми мемлекеттік рәміз болмаса да, қоғамдық сананың ерекше нысаны ретінде қабылданатынын, әрі мемлекет пен қоғамның дамуындағы басты бағдардың бірі болуы тиіс екенін еске салды.
Ақпарат көзі: Алматы қаласының ӨКҚ
